En sabeda, ai 20 de dezëmber, él sté i campionac talians da jí söpert – o “vertical”, sciöch’al ti vëgn dit – a Piancavallo tl Friul. La gara dl campionat talian é na competiziun sportiva organisada a livel nazional, olach’al röia adalerch atlec y atletes da döta la Talia por concuisté le titul de campiun o campionëssa taliana de schialpinism. Les atletes de Badiasport che á tut pert é Annalena Tasser, Maria Pescosta, Sofie Irsara, Sofia y Annalisa Pitscheider, che é en chësc iade gnüdes acompagnades dal alenadú Daniele Irsara y da Roberto Tasser. Trami dui á tröpa esperiënza tl ciamp dl schialpinism, ái pö instësc tut pert a tröpes gares por tröc agn alalungia. Porchël sái ince da ti dé i dër consëis ales atletes jones che mëss ciamó crësce dal punt d’odüda atletich, mo che á bele desmostré de bones capazités sön 413 m de deslivel odüs dant por chësta gara. Sciöche pro vigni competiziun s’áres dantadöt devertí y s’á porchël ince tut para na bela ciaria d’entusiasm por i proscimi apuntamënc sportifs che sará spo do la palsa dles festes da Nadé. Castel les posiziuns arjuntes dale atletes de Badiasport:
Pro la categori a U16 ele Annalena Tasser 10.; Sofia Pitscheider 11.
Pro la categoria U18 unse Sofie Irsara 6, y Maria Pescosta 11.
Pro la categoria U20 é ruvada Annalisa Pitscheider 4.
