L’ultimo fin dl’edema, ai 10 y ai 11 de jená, é le grup de atletes y atlec de Badiasport jü cina San Martino di Castrozza por tó pert nia ma a öna mo a döes gares de Campionat talian. La sabeda él impröma sté la gara sprint, olache i ot atlec – Leon Pitscheider, Adam Piccolruaz, Daniel Pizzinini, Annalena Tasser, Sofie Irsara, Maria Pescosta, Sofia y Annalisa Pitscheider – á podü mostré sö les capazités arjuntes cun i alenamënc fac les edemes y i mëisc denant.
Pro chësta gara olach’ara nen vá da ester dër asvelc te vigni fraziun, no ma da jí sö y jö cun i schi, mo ince tles perts tecniches da tó jö y mëte sö pels, y da salté sö por scalins ërc cun i schi sön rucsoch, á l’atleta Annalisa Pitscheider ciamó n iade desmostré so talënt. Cuntra aversares scialdi stersces ára concuisté le terzo scalin dl podest dl Campionat talian de sprint 2026 tla categoria U20. Tla categoria U18 é Sofie Irsara, che á ince bele na certa esperiënza tles competiziuns sportives, stada la plü sterscia dles atletes ladines, rovan al cuinto post de süa categoria.
Annalisa Pitscheider
Bele atira le de do êl odü dant la proscima competiziun. En chësc caje êl na gara a stafëta, a chëra ch’al ti vëgn dit “mixed race”; la competiziun vëgn fata danter scuadres da dui – n ël y na ëra o ince n ël cun n ater ël – che se müda jö sön deplü fraziuns de gara. N valügn atlec y atletes de Badiasport á chiló albü l’ocajiun da tó pert adöm cun atlec dl Brenta Team por avëi deplü scuadres y podëi fá esperiënza. Ince te chësc caje á Annalisa Pitscheider arjunt le miú plazamënt rovan al cuarto post cun le compagn de gara d’ocajiun Umberto Ferrazza.
Do chësc fin dl’edema intensif ti aspetel sëgn val’ edema de palsa ales atletes y ai atlec de schialpinism, olach’ai se alenará inant cun tröp entusiasm por les proscimes gares che sará de forá.
