Sciöch’al é tradiziun, á ince en chësc ann indô metü man la sajun dles gares cun i schi da alpinism por i atlec y les atletes dla uniun sportiva Badiasport. Tratan döt l’isté s’á i atlec alené da salté y pornanche al é tomé la pröma nëi ái indô podü mëte man da jí cun i schi y les pels sön la nëi. La sabeda, ai 13 de dezëmber, é les cater atletes Sofia Pitscheider, Sofie Irsara, Annalisa Pitscheider y Maria Pescosta, jüdes a Madonna di Campiglio cun i acompagnadus Werner Pescosta y Daniele Irsara, che é ince alenadú y presidënt dla uniun. Chiló áres tut pert ala pröma gara sprint de Coppa Italia de chësta sajun nöia da d’invern. Por Sofia, Sofie y Maria él sté na pröma esperiënza te na gara de chësta sort. Annalisa, che á bele tut pert a deplü competiziuns ti agn passá y á ince arjunt na certa esperiënza, s’á impröma cualifiché por la finala cun le terzo miú tëmp dl de danter les atletes de süa categoria. Ala fin éra spo rovada al bun cuinto post y cuarta miú taliana. Do chësc de de devertimënt y de suzes é les atletes indô rovades zoruch a ciasa cun tröp entusiasm da jí inant cun i alenamënc che ti aspeta cina ales proscimes gares.
