A Forni di Sopra él sté tratan l'ultima findledema döes gares nazionales varëntes por la Coppa Italia jonila de schialpinism. I atlec de Badiasport é rová cin' iadi sön le podest
Passa 150 é les atletes y i atlec jogn che á garejé en sabeda ai 12 y en domënia ai 13 de forá cun les pels a Forni di Sopra te döes gares de Coppa Italia jonila de schialpinism. Tratan i dui dis á i atlec y les atletes de Badiasport fat de bugn plazamënc y é rová bëgn cin' iadi sön le podest, rovan ince secundi tla classifica dles scuadres. La sabeda él gnü desfiré na gara plü asvelta, »sprint«, sciöche al ti vëgn ince dit, a eliminaziun. Te chësta gara á Mara Sottara (U18F) y Mattia Cefola (U20) davagné la medaia d'arjënt y Tommy Irsara (U16M) é rové al terzo post. Ince i atri atlec y atletes á arjunt de bugn resultac: tla categoria U16 feminila é Annalisa Pitscheider rovada 4., Hanna Irsara 5. y Elisa Aricó 8.
Dui arjënc la domënia
Le dedô êl na gara individuala pro chëra che Annalisa Pitscheider y Manuel Nagler – trami tla categoria U16 – á davagné la medaia d'arjënt. Chisc i plazamënc di atri atlec y atletes de Badiasport: tla categoria U16F é Hanna Irsara rovada 7. y Aricò Elisa 9. Tla categoria U16M s'á Emanuel Pescollderungg plazé al 13. post, Tobias Tasser al 15., Tommy Irsara al 17. y Jan Daniel Trebo al 27. Mara Sottara é rovada 4. tla categoria U18F; Maximinilan Nagler (U18M) s'á plazé al 32. post. Mattia Cefola é rové 6. y Giordan Nagler 16. tla categoria U20M.
@Katia Pizzinini La Usc di Ladins
