En domënia él sté a Niederdorf la finala dla 41ejima ediziun dla »VSS/Raiffeisen Stadt- und Dorflaufserie«. Deplü i atlec ladins che á tut pert, cun de bugn resultac

Passa 330 atlec y atletes dl Südtirol y nia ma á tut pert en domënia ai 10 d'otober ala gara finala dla 41ejima ediziun dla »VSS/Raiffeisen Stadt- und Dorflaufserie« a Niederdorf. La gara da salté, che vëgn metüda da jí dal 1980 incá, tol ite te deplü categories de atlec de dötes les etés, dai studënc cina ai gragn. La gara é gnüda davagnada, tla categoria feminila, da Agnes Tschurtschenthaler da Niederdorf, che á desfiré le percurs de 3.450 m te 13:05 menüc. Pro i ëi se á alze fora Michael Hofer da Deutschnofen, che á stlüt jö le percurs de 5.750 m te 18:41 menüc.

De bugn resultac por i atlec badioc

Cater atlec dla Val Badia, che salta por le »LC Bozen« á tut pert ala gara. Ara se trata de Maximilian Nagler, che é ruvé pröm te süa categoria, Jogn nasciüs danter le 2004 y le 2005, cun n tëmp de 24:57; Manuel Nagler s'á plazé al 4. post tla categoria Scolars A. Tla categoria Scolares A, nasciüdes danter le 2006 y 2007 é Hanna Irsara ruvada 5., Elisa Aricó 8. (kp)

Maximilian Nagler, Manuel Nagler, Elisa Aricò, Hanna Irsara