Na bela domënia de sport por i atlec badioc
14 partezipanc jogn de Badiasport al „Innsbrucker Stadtlauf“
En domënia ai 17 de ma él sté la 31ejima ediziun dl „Innsbrucker Stadtlauf“. Al start tla Maria-Theresien-Straße s’ál presenté na bela gran scuadra de 14 atlec badioc. A d’ëi ti aspetâl 1400 m da salté fora por le zënter storich. Ai ê partis sö te deplü categories: la categoria di U-10, chëra di U-12, chëra di U-14, chëra di U-16, y la categoria di U-18.
Adang Emilie y Irsara Hanna á arjunt n bun plazamënt tla pröma categoria di U-10/mitans cun n tëmp de 7:49 y de 7:50, rovan al 33ejimo y al 34ejimo post te categoria. La plü asvelta de chësta categoria é stada Miriam Langhofer cun n tëmp de 5:22.
Tla categoria U-12/mituns á l’atlet Tasser Samuel stlüt jö la gara cun n tëmp de 7:48 (62. post te süa categoria).
Tla categoria di U-14/mitans á Castlunger Anna stlüt jö al 22. post te süa categoria cun n tëmp de 6:06. Tla medema categoria U-14 /mituns á Pizzinini David arjunt le travert cun n bun tëmp de 5:32 (21. post de categoria U-14/mituns).
Tla categoria U-16/jogn á l’atlet de Badiasport Ploner Nicolas arjunt le buniscimo 3. post de categoria cun n tëmp de 5:09. Le miú de categoria é sté Bora Adam cun le tëmp de 5:03. Tla medema categoria á ince i atri atlec badioc arjunt de bugn plazamënc. Irsara Vitor á stlüt jö cun le tëmp de 5:19 (8. post de categoria), Crazzolara Damiano á arjunt le travert cun n tëmp de 5:21 (10. post de categoria), y atira dedô él rové adalerch Canins Ivan cun le tëmp de 5:22 (11. Post de categoria). Debon Robert á stlüt jö al 23. post de categoria cun n tëmp de 5:51. Le proscimo jogn de Badiasport a rové al travert é spo sté Ganibegovic Rocco cun le tëmp de 6:45 (31. post de categoria).
Tla categoria di jogn U-18 él gnü arjunt le podest da Castlunger Matthias che á stlüt jö cun n buniscimo 2. post de categoria cun le tëmp de 4:52. Le plü asvelt de chësta categoria é sté Naschberger Julian cun le tëmp de 4:45.
Ciamó n podest á arjunt le grup de Badiasport cun l’atleta Ploner Melanie che é rovada 2. tla categoria U-18/jones cun le tëmp de 5:24. N bun plazamënt á ince arjunt Clara Valentina rovan al travert cun n tëmp de 6:05 (6. post de categoria). La plü asvelta te chësta categoria é stada Zenz Julia cun le tëmp de 5:16.