L’atlet de Badiasport arjunj n buniscimo 5. post
Schialpinism - Ai 21 y 22 de forà él stè a Alpago la 32. ediziun dla Transcavallo, na gara storica dl schialpinism. Al é na gara a scuadres da dui che vëgn fata te döes tapes. Michael Moling de Badiasport à tut pert te scuadra cun Davide Pierantoni desmostran inće en chësc iade de ester en gran forma. Ai s’à concuisté le 5. post do dales scuadres plü stersces a livel talian.
En sabeda, pro la pröma tapa, êl incër 200 partezipanć al start. I ëi messâ afrontè n percurs de plü de 16 km cun 1810 m de deslivel che condejô söla Cima delle Vacche (2055m), söl Monte Cornor (2174m) y söl Monte Guslon (2196m). Moling-Pierantoni é rovà cuinti te 2:09:13, do da Lenzi-Eydallin (1:52:08), Reichegger-Boscacci (1:54:10), Trento-Pivk (1:55:33) y Beccari-Weisskopf (2:02:56).
Le percurs preodü por la secunda tapa ê de prësc 21 km cun 2566 m de deslivel olache le percurs condejô bëgn dui iadi indô söl Monte Guslon. Por gauja dl bur tëmp, danter vënt, nëi y ciarü, à i organisadus messè tó ca le percurs alternatif de ma plü 10 km y 1385 m de deslivel che ne rovâ nia plü söla piza dl Monte Guslon.
Pro la secunda tapa ne s’à l’ordinn dles prömes 5 scuadres nia mudé y Moling-Pierantoni à confermè le 5. post cun le tëmp de 1:22:07, do da Lenzi-Eydallin (1:14:54), Reichegger-Boscacci (1:14:54), Trento-Pivk (1:16:28) y Beccari-Weisskopf (1:19:31).